Bashkimi Europian ka reaguar për herë të parë pas zgjedhjeve të 25 qershorit në Shqipëri.
Në një deklaratë për mediat, Përfaqësuesja e Lartë e BE Federica Mogherini dhe Komisioneri Johanes Hahn deklarojnë se zgjedhjet ishin të rregullta.
Mogherini dhe Johannes Hahn shprehen se do të punojnë me qeverinë e re për procesin e reformave, sidomos asaj në drejtësi për të vijuar procesin e integrimit në BE.
“Pasi të përfundojë procesi zgjedhor, do të angazhohemi me qeverinë e re për të mbështetur procesin e reformave dhe për të vazhduar procesin e integrimit në BE.
Vazhdimi i reformës së drejtësisë dhe lufta kundër trafikut të drogës dhe kultivimit do të jetë e një rëndësie të veçantë në këtë drejtim” thuhet ndër të tjera në deklaratën e Mogherinit dhe Hahn.
Bashkimi Europian ka qenë i angazhuar maksimalisht në 6 muajt e fundit të këtij viti në Shqipëri pas krizës politike dhe protestave të PD.
