Pas miratimit të paketës Anti-KÇK nga qeveria 2 ditë më parë ka reaguar edhe Ambasada Amerikane në Tiranë.
Ambasada thotë se i mirëpret përpjekjet e qeverisë për të parandaluar krimin e organizuar që të përdorë pasurinë e paligjshme për të minuar themelet e shtetit ligjor.
Sipas ambasadës ligji duhet të mbështesë institucionet e reja të drejtësisë të ngarkuara me ndjekjen penale të krimit të organizuar. Sakaq Ambasada shpreh interes të madh në ndjekjen e zbatimit të ligjit në vazhdim.
“Ndërsa vazhdon zbatimi i reformave të rëndësishme të drejtësisë, Shtetet e Bashkuara mirëpresin përpjekjet e intensifikuara nga Qeveria e Shqipërisë për të parandaluar krimin e organizuar që të përdorë pasurinë e paligjshme për të minuar themelet e shtetit ligjor.
Mekanizmat e përforcuar për zbatimin e ligjit duhet edhe të mbështesin institucionet e reja të drejtësisë të ngarkuara me ndjekjen penale të krimit të organizuar, edhe të harmonizohen me standardet e procesit të drejtë ligjor. Ne do të vazhdojmë ta ndjekim zbatimin e këtij ligji me interes te madh”, shkruan ambasada.
