Jo më 140, shifra që shqiptarët nuk konsiderohen të varfër tashmë është 126 euro. Kështu deklaroi sërish Ministrja e Financave dhe Ekonomisë, Delina Ibrahimaj e cila e uli shifrën e të ardhurave mujore. Pak ditë më parë bëri një deklaratë e cila u bë virale, kur dha një shifër se sa duhet të jenë të ardhurat mujore të një personi për të mos u konsideruar i varfër në situatën ku po jetojmë, duke thënë se mjaftojnë 140 euro.
“Nëse pyetja referohet sa duhet të gjenerojë një individ për të mos u konsideruar i varfër, kjo shifër është diku tek 130-140 euro për person”, tha Ibrahimaj në një studio televizive.
Sot në Komisionin e Ekonomisë, Ibrahimaj tha se 126 euro është shifra e përllogaritur e INSTAT.
‘Ju bëtë një referencë për minimumin jetik në asnjë moment unë nuk kam deklaruar minimumin jetik. Më është bërë një pyetje për një tregues statistikor që publikohet nga INSTAT që i takon kufirit të varfërisë dhe iu jam referuar kufirit të varfërisë të llogaritur nga INSTAT që për frymë është 126 euro, mund t’i referoheni INSTAT me mënyrën e llogaritjes së tyre që është metodologji e eurostat që aplikohet në gjithë vendet e rajonit pra nuk jam shprehur për llogaritje të ministrisë së financave dhe ekonomisë por për një tregues statistikor të publikuar nga INSTAT“’– tha sot ministrja.
