Ministri Hekuran Murati njoftoi ditën e djeshme përmes një postimi në rrjetin e tij social Facebook se ka realizuar një takim me Alice P. Albright, e cila është kryeshefe ekzekutive e Korporatës së Sfidave të Mijëvjeçarit MCC. Gjithashtu, ajo është dhe vajza e ish-sekretares amerikane Madeleine Albright.
“Kënaqësi të takoj në Washington DC znj. Alice P. Albright, kryeshefe ekzekutive e Korporatës së Sfidave të Mijëvjeçarit MCC, dhe ekipin e saj, për të diskutuar rreth Programit Kompakt që parasheh investime mbi 200 milionë dollarë në fushën e energjisë në Kosovë”.
Udhëheqësja e kësaj agjencie të pavarur, të themeluar nga Kongresi Amerikan, është vajza e ish-sekretares amerikane, Madeleine Albright, e cila vdiq në mars dhe pritet të varroset më 27 prill, në Washington.
Albright është në krye të MCC-së që nga shkurti i këtij viti. Edhe të bijën, ashtu si të ëmën, ministri Murati e ka quajtur mike të madhe të Kosovës.
“Jemi partnerë, por edhe miq. Me këto fjalë e përmbyllëm takimin me znj. Albright, mike e madhe e vendit tonë”.
Së fundmi, ditën e djeshme presidenca njoftoi se me ftesë të familjes Albright, Presidentja Vjosa Osmani do të marrë pjesë në ceremoninë e varrimit të ish-sekretares. Sot, nga Zyra e Kryeministrit u konfirmua se edhe Albin Kurti merr pjesë në ceremoni.
