Edhe pse para dy ditësh dorëzuan dorëheqjet, ministrat teknikë dhe zv/kryeministrja do të vazhdojnë të qëndrojnë në detyrë.
Ledina Mandia deklaroi sot se do të vazhdojë që të qëndrojë në detyrë ashtu sikur e parashikon Kushtetuta deri në zëvendësimin e tyre nga parlamenti.
“Kushtetuta e përcakton qartë që edhe në rastin e dorëheqjes është detyrimi i çdo ministri apo edhe zëvendëskryeministri të qëndrojë në detyrë, derisa të përmbushen kërkesat ligjore, që janë dekreti i presidentit dhe votimi në Parlament. Në asnjë rast detyra nuk braktiset”, tha Mandija.
Por edhe pse Rama iu uroi suksese në jetë pasi e cilësoi raportin politik dhe të njëanshëm, ata do të vijojnë që të qëndrojnë në detyrë derisa të shkarkohen nga parlamenti në shtator.
Megjithatë ata do të jenë formalisht në detyrë, pasi kompetencat i kanë deleguar tek zv/ministrat.
