Ditën e nesërme, më 20 nëntor bëhen katër vjet nga aksidenti tragjik që i mori jetën ish-ministrit dhe ish-deputetit demokrat, Sokol Olldashi.
Miku i tij gazetari Ilir Kadia, ka ndarë sot me ndjekësit e tij në facebook, takimin e fundit që pati me Sokolin, një ditë para aksidentit fatal, ndërsa rrëfën bisedën që pati me “Çurçillin”, siç e thërriste ai të ndjerin.
Postimi i Ilir Kadisë në facebook:
Mëngjesin e një dite para se të ndodhte aksidenti u takuam rastësisht tek “Artisti”. Po pinim kafe me Ad’ Krastën, kur u shfaq Koli me cigarishte në buzë. “Hajde e pimë jashtë! Këtu s’lejohet! Hajdeni se kam mall!” -na tha e ne u çuam me qef.
Biseduam nga të gjitha muhabetet nga “a” tek “zh” për gati dy orë. Sikur u rrëfyem! Unë i thosha Kolit Çërçill! Se jo vetëm i ngjante në atë foton e njohur me puro, por edhe pse ishte i qartë dhe i vendosur në çthosh e bënte, si ai.
Kur u dha lajmi në televizion atë natë ferri u futa në dhomën time e qava… qava! Pas varrimit shkova vetë në vendngjarje të bindesha për çfarë kish ndodhur. E njihja shumë mirë atë vend. Kisha punuar ekonomist në kooperative në fillim të viteve ‘80. Pyeta mirë e mirë! U binda! Fati i keq në një natë shekspiriane.
Tani, sa herë shkoj në varreza, kthehem medoemos tek Koli!
E shoh në sy gjatë!
