Kryetari i LSI-së Ilir Meta i bën thirrje Kryeministrit të nisë dialogun me opozitën për zgjidhjen e krizës pasi e ka detyrim kushtetues. Pas mbledhjes së Komitetit Drejtues të LSI-së, Meta foli për domosdoshmërinë e zgjidhjes së krizës dhe përfshirjes së opozitës në zgjedhje. Ai citoi propozimet e bëra nga PDIU për zgjidhjen e krizës duke i bërë thirrje edhe PS-së të ndjekë rrugën e dialogut me opozitën dhe të mos bëjë ftesa formale për takime.
“PDIU ka bërë propozime konkrete për zgjidhjen e krizës, ne si LSI gjithashtu jemi angazhuar për dialog dhe shpresojmë që edhe pjesa tjetër e koalcionit të ndjekë të njëjtën rrugë. E kemi detyrim kushtetues të zhvillojmë zgjedhje të lira dhe për këtë duhet dialog me opozitën”, ka thënë sot Meta.
Duhet të mendojmë për konsensus sepse zgjedhjet janë të të gjithëve, reforma në drejtësi është e të gjithëve si dhe të gjitha problematikat dhe zgjidhja e tyre janë çështje e të gjithëve. Ndaj dhe ne jemi, dhe do të vazhdojmë të jemi që opozita të përfshihet në zgjidhje e në zgjedhje.
