Presidenti Ilir Meta deklaroi në konferencën e sotme se ka nisur procedurat për të shpallur datën e zgjedhjeve për gjashtë bashkitë që nuk kanë kryetar.
Meta tha para mediave se i ka dërguar një letër KQZ-së për të marrë informacion mbi bashkitë që nuk kanë kryetar në mënyrë që të vijohet më pas me procedurat që ndjekin për zgjedhjen e krerëve të tyre. Ndër të tjera, ai tha se nuk ka nevojë të konsultohet me askënd, pasi këto janë zgjedhje lokale dhe jo parlamentare.
Por cilat janë bashkisë pa kryetar, nga zgjedhjet lokale të 30 qershorit 2019?
Në Bashkinë e Shkodrës, ligji i dekriminalizimi i kushtoi postin Valdrin Pjetrit, ku ndonëse doli i pastër nga gjykata, në krye të kësaj Bashkie vijon të qëndrojë Voltana Ademi.
Dekriminalizimi, la gjithashtu pa kryetar edhe bashkinë e Vorës. Agim Kajmaku i dalë në zgjedhjet e 30 qershorit, u akuzua për 3 vepra penale “Falsifikim i vulave, stampave ose formularëve”. “Falsifikim i dokumenteve” dhe “Kryerja e funksionit pas dhënies fund të detyrës”.
Durrësi, është gjithashtu pa kryetar bashkie pasi kryebashkiakja Valbona Sako dha dorëheqjen pas tërmetit të 26 nëntorit.
Në Rrogozhinë, Haxhi Memolla u nda nga jeta si pasojë e një arresti kardiak, ndërsa kandidimi për deputet në zgjedhjet e 25 prillit, la bashkinë e Dibrës pa kryetar. Dionis Ymeri garoi në listat e PS, për një mandat deputeti, ndonëse nuk arriti të sigurojë një karrige në parlament.
Sakaq, arrestimi nën akuzën e korrupsionit e pabarazisë në tendera, i Fatos Tushes, ka lënë pa kryetar edhe Bashkinë e Lushnjës. Kujtojmë se Tushe u shkarkua me vendim të kryeministrit Edi Rama pas arrestimit të tij.
