Në çdo diskutim për lojtarin më të mirë në botë, ekspertët, tifozët dhe analistët gjithmonë bazohen te disa pika: trofetë e fituar me skuadrën, trofetë individualë dhe golat e shënuar. Por ajo që anashkalohet shpesh është mënyra sesi një lojtar bën tifozët të ndihen, emocionet që u shkakton kur zbret në fushë.
Pak kombësi në botë e ndjenë futbollin më shumë sesa argjentinasit, rreth 40 mijë prej tyre ishin të dielën në Katar për të ndjekur finalen e madhe kundër Francës, që skuadra e tyre fitoi me penallti.
Pas fitores kundër Kroacisë në gjysmëifnale, një gazetare argjentinase mori Messin veçmas për intervistë, por në vend që t’i bënte pyetje i tha: “Nuk gjen fëmijë në Argjentinë që nuk ka bluzën tënde, origjinale apo false… Keni prekur zemrat e të gjithëve dhe për mua kjo është më e madhe se sa fitorja e Kupës së Botës. Askush nuk ta merr dot këtë”.
Me shumë gjasa, me fjalët e saj bien dakord të gjithë në Argjentinë, të cilët e kanë ngritur Messin vitet e fundit në piedestal. “Sidomos në këtë Botëror, ai është bërë njeriu që merr përsipër gjithçka dhe zgjidh situatat për Argjentinën”, thotë për CNN gazetari Santi Bauza.
Por rruga drejt përjetësisë nuk ka qenë e lehtë për Messin. Pas dështimeve në Botërorin 2014 dhe finaleve të Kupës së Amerikës të humbura në vitet 2015 dhe 2016, ai njoftoi tërheqjen nga kombëtarja. Fatmirësisht për të gjithë, kjo nuk zgjati shumë.
Krahasimi me Maradonën
Tani, pasi është krahasuar për vite me madhështinë e një tjetër argjentinasi shtatshkurtër, Diego Armando Maradona, Messi mund të dalë më në fund nga hija e “Pibe de Oro”-s, i cili tashmë nuk jeton më.
Maradona udhëhoqi thuajse i vetëm Argjentinën drejt lavdisë në Botërorin e vitit 2016, ndërsa Messi përsëriti pak a shumë të njëjtën arritje, duke shënuar në 6 ndeshje nga 7 të luajtura, me 2 gola dhe 1 asist në finalen e madhe kundër Francës.
Shpesh Messi është kritikuar për mungesën e pasionit dhe entuziazmit kur vishte fanellën bardhekaltër, përkundër spektaklit dhe impenjimit që tregonte me atë “blaugrana” të Barcelonës. Ish-kampioni i botës me Argjentinën e vitit 1978, Osvaldo Ardiles, thotë se krahasimi me Diegon e madh ka qenë i pashmangshëm, por i pafat për Messin.
“Ai ka jetuar gjithmonë në hijen e Maradonës, njeriut që na udhëhoqi në Botërorin e fundit në vitin 1986”, shkroi Ardiles për “Daily Mail”. “Nuk mund t’i shpëtojë kurrë këtyre krahasimeve. Janë të dy numra 10, të dy lojtarët më të mirë në botë dhe të aftë për të bërë magji në fushë. Sigurisht shumë të ndryshëm në personalitet”.
Por tashmë, nga 18 dhjetori 2022, Messi krijoi trashëgiminë e tij si hero i një kombi të tërë, duke dalë më në fund nga hija e Maradonës.
