Ish-presidenti i Republikës Rexhep Meidani ka shprehur ngushëllimet e tija për ndarjen e parakoshme nga jeta të ish-Presidentit Bujar Nishani. Mesazhin ai e ka përcjellë nëpërmjet rrjeteve sociale, ku sjell në vëmendje edeh faktin se Nishani ishte presidenti më i ri gjatë periudhës së pluralizmit politik.
Meidani kujton takimet me të, teksa thotë se i bënte përshtypje maturia, thjeshtësia dhe qetësia e tij. Ai vlerëson gjithashtu mesazhet nga të dyja kampet politike për humbjen e Bujar Nishanit, i cili ndërroi jetë ditën e djeshme.
“Pavarësisht brendësisë së sinqeritetit të reagimit, e tillë duhet të jetë, në të vërtetë, jo vetëm gjuha politike, por dhe mesazhi publik e kodi etik në çdo rast tjetër, sepse rrezatimi i tyre në shoqëri veçse e bëjnë atë më njerëzore, më të shëndetshme dhe më të përkushtuar. Për këtë shoqëri të civilizuar, për një politikë të drejtë dhe një shtet human e demokratik, ai jetoi dhe punoi deri në ditët e fundit të jetës së tij. I paharruar qoftë kujtimi i tij!
Ngushëllime të sinqerta për familjen dhe të afërmit, miqtë dhe kolegët e tij të ngushtë!”, e mbyll shkrimin ish-Presidenti në rrjetet sociale.
