Protesta e opozitës ka marrë sërish vëmendjen e mediave ndërkombëtare, si Associated Press, The Washington Post, New York Times, Fox News, Zëri i Amerikës ndërsa Agjencia ndërkombëtare e lajmeve Reuters ka transmetuan pamjet live gjatë kohës së mbajtjes së tubimit.
Me titullin “Mijëra në shesh kundër qeverisë’, Associated Press shkruan se mbështetësit e Partisë Demokratike u mblodhën përpara Kryeministrisë për të kërkuar rrëzimin e qeverisë dhe zgjedhje të parakohshme.
Protestuesit dhe liderët e opozitës akuzojnë qeverinë për korrupsion dhe lidhje me krimin e organizuar, thekson agjencia ndërkombëtare e lajmeve.
“Zëri i Amerikës” ka përshkruar edhe tensionet e krijuara përpara godinës së Parlamentit.
Protesta është pasqyruar edhe në mediat italiane. Agjencia italiane e lajmeve, Ansa, thekson se autoritetet shqiptare angazhuan 1800 agjentë, vendosen kamera të sigurisë dhe fortifikuan dyert dhe dritaret e kryeministrisë për shkaqe sigurie.
