Policia Rrugore e Tiranës ka shpërndarë një njoftim për mediat, duke u krekosur se vetëm gjatë javës së shkuar janë gjobitur 4 744 qytetarë që përdorin automjetet.
Në njoftimin zyrtar të Policisë së Shtetit, që në hyrje thuhet se me rastin e festave të fundvitit janë shtuar kontrollet, duke e bërë të qartë se gjobat e verdha në xhamin e makinës janë “dhurata” festive nga policia.
Ndërkohë, teksa policia duket e zënë me plotësimin e gjobave, ka harruar faktin se qytetarët shpesh janë të detyruar të presin me orë të tëra në trafik, në një kryeqytet ku kaoset e qarkullimit janë të përditshme dhe jo sezonale.
Policia flet me shifra për gjobat e vendosura në emër të parandalimit të aksidenteve, por shifrat e aksidenteve mbeten të larta. Sipas të dhënave zyrtare të INSTAT, vetëm gjatë vitit 2025 janë raportuar:
Janar 2025: 125 aksidente rrugore
Maj 2025: 116 aksidente
Qershor 2025: 107 aksidente
Korrik 2025: 131 aksidente
Gusht 2025: 159 aksidente
Shtator 2025: 102 aksidente
Tetor 2025: 116 aksidente
Pra, aksidentet ndodhin gjatë gjithë vitit, jo vetëm në prag festash, çka tregon se policia, në vend që të kufizohet te “aksionet” me breshëri gjobash në fundvit, duhet të kuptojë se siguria rrugore nuk parandalohet me fletë-gjobë sezonale.
Njoftimi i policisë
Gjatë javës që kaloi dhe gjatë kësaj fundjave, shërbimet e Policisë Rrugore, me rastin e afrimit të festave të fundvitit dhe shtimit të fluksit të lëvizjes, kanë intensifikuar kontrollet dhe patrullimet në të gjitha akset dhe pikat lidhëse të kryeqytetit, me objektivat madhorë, parandalimin e aksidenteve dhe përmbushjen e parametrave të sigurisë në rrugë.
Si rezultat i pranisë shtesë dhe përdorimit të pajisjeve logjistike bashkëkohore, janë konstatuar shkelje rrugore të rrezikshme, për të cilat janë vënë masat administrative si më poshtë:
Qarkullim me shpejtësi mbi normat e lejuara – 1838 masa;
Përdorimi i celularit gjatë drejtimit të mjetit – 1207 masa;
Mosvendosje e rripit të sigurimit – 722 masa;
Mosvendosje e kaskës mbrojtëse – 653 masa;
Mosrespektim i radhës së qarkullimit – 250 masa;
Parakalim i gabuar – 74 masa.
Më tej, për shkelje të rënda të Kodit Rrugor dhe për vepra penale në fushën e qarkullimit rrugor:
janë arrestuar/proceduar penalisht 32 shtetas;
janë bllokuar 53 automjete.
Policia Rrugore apelon sërish, për të gjithë drejtuesit e mjeteve dhe përdoruesit e tjerë të rrugës, që të respektojnë rregullat e qarkullimit, si një kontribut i përbashkët dhe tejet i rëndësishëm për garantimin e sigurisë rrugore dhe për mbrojtjen e jetës.
