Gjykata e Posaçme i ka kthyer 5 pasuritë e sekuestruara kompanisë “Arlis Ndërtim”, të cilat ishin porositur nga Oltion Bistri dhe familjarët e tij, për të cilat kishin paguar 1 milion e 300 mijë euro.
Shoqëria “Arlis” Ndërtim, në pronësi të Armand Lilos, i afërt me Fatmir Xhafajn, kishte kërkuar revokimin e pjesshëm të vendimit nr. 19 për sekuestron e pronave të Oltion Bistrit dhe familjarëve të tij, për 5 prona, apartamente dhe dyqane.
Gjykata hoqi nga sekuestro këto pasuri që ishin me kontratë porosie nga ish-shefi i Operacionales, i akuzuar për shpërdorim detyre. Çështja ishte kundërshtuar në gjykatë nga avokati i kompanisë “Arlis”. Ndërkohë që edhe nga ana e SPAK nuk pati kundërshtime ndaj kërkesës së kompanisë së Lilos.
Sipas vendimit, paratë që kompania kishte marrë nga Bistri dhe familjarët, i kalojnë Drejtorisë së Administrimit të Aseteve të Pasurive të Sekuestruara, ndërsa apartamentet dhe dyqanet i kthehen shoqërisë “Arlis”.
Kjo e fundit pretendoi se Bistri kishte porositur 5 apartamente në ndërtim, madje kishte bërë edhe pagesën, por që pas disa kohësh, kërkoi prishjen e kontratës pasi nuk donte t’i blinte apartamentet dhe kontrata ishte zgjidhur. SPAK ra në gjurmët e pronave gjatë verifikimeve në fazën hetimore, ku rezultoi sipas saj se pronat ishin si pjesë e pasurisë së drejtuesit të policisë dhe familjarëve të tij, dhe për këtë mori masën e sekuestros së 10 apartamenteve, 22 dyqaneve, 1 vile me sipërfaqe trualli 200m², një garazh dhe një automjet tip Range Rover viti 2012 me vlerë 3.1 milion euro.
Armand Lilo i kullave dhe ndërtimeve pa leje
Armand Lilo i cili ka përfituar nga Gjykata me konsensusin e SPAK pasuritë e paluajtshme, është një emër i njohur.
Të gjithëve na ka rënë në sy kulla në hyrje të rrugës së Kavajës e quajtur “The Eyes of Tirana”. Kulla në pronësi të biznesmenit dhe njëkohësisht mikut të Fatmir Xhafës, Armand Lilos.
Ky i fundit me kompaninë e tij “Arlis Ndërtim” është një prej biznesmenëve më të mëdhenj të ndërtimit në Tiranë, përfitues i shumë tenderave bashkiakë nga Erion Veliaj me të cilin së bashku me Xhafën dyshohet se kanë de facto kompleksin “Square 21” me kulla të larta.
Lilo, person me precedentë penalë, i ka shtuar kullës së tij 8 kate pa leje (7 lart + 1 nëntokë), teksa Rama lante gojën duke “denoncuar’ këtë rast.
Kulla supozohej të kishte 24 kate mbi tokë e 3 kate nëntokë, ndërsa me shtesën e re ka gërvishtur qiellin e Tiranës pasi ka shkuar 31 kate mbi tokë e me 4 kate nën tokë.
Çfarë bëri Drejtoria e Pastrimit të Parave para se Rama të jepte leje për ndërtimin e saj? Çdo institucion e di që kulla me vlerë 250 MLN € po ndërtohet me para droge. Qeveria i ka dhënë njeriut të Xhafajt edhe leje të tjera për kulla. Të tilla janë ajo për kompaninë “Unico Construction” të Armand Lilos, i cili mori leje ndërtimi për kullë 25 kate te Komuna e Parisit. “Building Construction Invest” është gjithashtu kompania e blerë nga Armand Lilo, e cila ka marrë leje ndërtimi për kulla te diga e Liqenit.
Ndërsa ministrja Mirela Kumbaro dhe kryeministri Edi Rama, një vit pasi e cilësonte si ndërtues abuzues që kishte verbuar gjyqtarin, do ta nderonte me statusin special të investitorit strategjik.
Kompania “Klais” e themeluar fillimisht nga Altin Cela, kunati i Armand Lilos, në tetor të vitit 2023, me firmë të Edi Ramës merr leje ndërtimi për objektin, “Green Cost Resort 2”, Hotel me 1-2-3-4 dhe 5 kate në Bashkinë Himarë dhe më pas për këtë resort qeveria i dha dhe statusin special, ku sipas vendimit, Armand Lilo nuk do të paguajë për 10 vite tatim fitimin.
Më tej, Armand Lilo bleu edhe 6 milionë euro aksione në një prej bankave të nivelit të dytë, ndërsa në gusht të këtij viti, kompania e tij Armar Grup, u bë pronare e Klubit të Futbollit të Pogradecit.
Pas gjithë kësaj perandorie, dyshohet se është pikërisht Fatmir Xhafaj.
