Kandidati për Primare i Tiranës, mjeku Ilir Alimehmeti i ftuar në një intervistë për “RTV Ora” u pyet dhe mbi strategjinë e tij për punën që do të bëjë në Tiranë, në rast fitoreje.
Alimehmeti deklaroi se duhen parë problemet që zgjidhen brenda një ditë e ato që kërkojnë më tepër kohë.
Sa i përket tenderave që bëhen në Bashkinë Tiranë, shumë prej të cilëve abuzivë, ai u shpreh se ata duhet të bëhen publikë duke shmangur abuzimet.
DEKLARATA
Ilir Alimehmeti: Tirana jo vetëm është bashkia më e madhe, por është bashkia që mban mbi një të tretën e popullatës në të, ndoshta dhe më shumë se aq. Halle dhe probleme ka shumë. Jo të gjitha zgjidhen në një ditë. Disa zgjidhen shumë shpejt, është shumë e thjeshtë të zgjidhësh disa prej tyre, madje nuk e kupton se pse ekzistojnë ato probleme aty. Nuk kërkojnë para e asgjë, thjesht s’kanë pasur vëmendjen dhe kohën. Pastaj ka probleme të tjera që kërkojnë kohën e vet, duhen studiuar më mirë, duhen parë me kujdes të gjitha opsionet si mund të zgjidhen.
Anila Zyberaj: Në fakt, bie në sy, në tenderat që dalin nga bashkia e Tiranës gjithmonë fiton kompania që ofron shumën më të lartë.
Ilir Alimehmeti: Para jush keni një antisens, se përse e bëjmë tenderin. Ne duam cilësinë sa më të mirë dhe çmimin sa më të ulët, kjo është arsyeja e tenderit publik. e kundërta është nosens. Në këtë rast është shumë e thjeshtë, gjatë procesit që bëhen këto tendera mbi një shifër të caktuar e lart, nuk ka ndonjë problem që këto tendera të bëhen publik.
Të ketë një prezencë audio vizive, kamera, mikrofonë e të jetë transparent. Kjo është një nga ato gjëra që bëhet shumë shpejt, nuk kërkon para, por ka vlerë tejet të madhe. Ju do zbuloni se me paratë që bën një shkollë mund të bëni 6-7 shkolla.
Pra ti ke bërë një shkollë, por ke abuzuar shumë me paratë. Shkolla ka dalë e mrekullueshme por me 5 mln euro. Ndërkohë që në Europë një shkollë kushton më pak se 700 mijë euro, me standarde europiane, kjo me 5 mln euro çfarë është?!
