Kryetari i PD,Sali Berisha ka dhënë detaje lidhur me mënyrën se si vepronte sipas tij, ish-zyrtari i FBI, McGonigal për të përfituar para nga biznesmenët.
Në emisionin “Opinion”, Berisha tha se McGonigal u kërkonte para personave të shpallur non grata për t’u hequr sanksionet.
Më tej kreu i demokratëve tha se u ka deklaruar personave të tjerë që është dhe lobisti i Sali Berishës.
“Ka vepruar në mënyra të shëmtuara. Së pari, këta merrnin, McGonigal merrte formë të personave të shpallur non grata nga thesari dhe fshinte emrin e personit dhe ua servirte biznesmenin ja ku je ti dhe se së shpejti do e marrësh vesh dhe se duhet të japësh kaq dhe aq për të shpëtuar. Të tjerëve u shkonte, u thoshte se unë jam lobisti i Sali Berishës dhe se po loboj dhe e kam afër. Prandaj ne insistojmë në komisionin hetimor parlamentar”,-tha Berisha.
Kryedemorkati foli dhe për protestën e nesërme, duke thënë se revolucioni nuk do të ndalojë deri në largimin e qeverisë.
“Më madhështore, më të fuqishme. Nesër është sipari i revolucionit. Vazhdon revolucioni demokratik. Të jenë të bindur se nuk ka të ndalur deri në fitore. I bëj thirrje shqiptarëve që qindra e mijëra që kanë ardhur në Tiranë dhe po vijën dhe ata që janë në tiranë të bashkohemi”,-tha Berisha.
