Një tjetër fëmijë ka gjetur vdekjen mesditën e kësaj të mërkure në plazhin e Portonovës në Zvërnec.
Mësohet se djali që është mbytur po lahej me një dyshek plazhi bashkë me një shokun e tij.
Dy fëmijët janë kapur në befasi nga rryma që ka filluar t’i tërheqë në brendësi dhe kanë tentuar të dalin. Njëri prej tyre, ka arritur të dalë në breg, ndërsa djali tjetër nuk ka mundur.
Sipas të njejtave burime, nëna e djalit të mbytur kur ka parë shokun e të birit në breg është nisur me vrap për ta shpëtuar, por i ka rënë të fikët në breg të detit.
Ajo është transportuar në gjendje shoku në spitalin e Vlorës. Në gjendje shoku është edhe fëmija tjetër, që siç raportohet kishte pirë edhe shumë ujë nga lufta me dallgët.
