Muzeu i famshëm i Luvrit në Paris ka mbyllur dyert, pasi punonjësit nisën një grevë të përgjithshme, duke paralajmëruar se situata brenda institucionit ka arritur në pikë kritike. Greva vjen në një nga periudhat më të ngarkuara të vitit për muzeun më të vizituar në botë.
Të tri sindikatat kryesore të Luvrit kanë shpallur një grevë të vazhdueshme, duke kërkuar investime urgjente në infrastrukturë, përmirësim të kushteve të punës dhe shtim të stafit, veçanërisht në sektorin e sigurisë. Sipas tyre, qysh prej vitit 2015 janë shkurtuar rreth 200 vende pune.
Pakënaqësitë janë shtuar pas një serie incidentesh të rënda: më 19 tetor, një bandë grabiti bizhuteri historike me vlerë rreth 88 milionë euro brenda vetëm shtatë minutash, ndërsa muajin pasues një rrjedhje uji dëmtoi qindra dokumente në departamentin egjiptian. Më pas, një galeri u mbyll për shkak të rrezikut nga tavani.
Punonjësit protestojnë gjithashtu kundër vendimit për të rritur me 45% çmimin e biletës për vizitorët nga jashtë Zonës Ekonomike Europiane, përfshirë turistë nga SHBA, Britania dhe Kina, të cilët nga janari do të paguajnë 32 euro për hyrje. Sindikatat e cilësojnë këtë masë si diskriminuese dhe në kundërshtim me parimin e aksesit të barabartë në kulturë.
Raporte zyrtare kanë konfirmuar se muzeu ka vuajtur nga nëninvestimi kronik në siguri, ndërsa autoritetet franceze kanë pranuar se rreziqet janë nënvlerësuar prej vitesh. Pas grabitjes, qeveria ka nisur hetime dhe ka paralajmëruar një ristrukturim të thellë të institucionit.
Drejtuesja e Luvrit, Laurence des Cars, kishte paralajmëruar më herët se vizita në muze ishte kthyer në një “sprovë fizike” për shkak të mbipopullimit dhe gjendjes së godinës.
Presidenti Emmanuel Macron ka njoftuar tashmë një projekt të madh për ndërtimin e një hyrjeje të re dhe krijimin e një salle të veçantë për Mona Lizën.
Nëse greva vijon, Luvri rrezikon ditë të tëra mbylljeje ose funksionim të pjesshëm, duke shtuar presionin mbi autoritetet franceze për të gjetur një zgjidhje të shpejtë.
