“Ose është i korruptuar ose i paaftë”, kështu e konsideroi deputetja Jorida Tabaku qëndrimin e kryeministrit Edi Rama kur tha se do të vazhdojë pagesat për inceneratorët, ndonëse ai i Fierit është sekuestruar nga SPAK dhe një ish ministër dhe ish deputet janë në pranga.
Tabaku deklaron se ndonëse Komisioni për Inceneratorët provoi lidhjet e qeverisë me procedurat korruptive për skandalin, sërish Rama bën si i paditur dhe refuzon të ndërpresë pagesat për inceneratorët.
“Megjithëse një ministër i tij u arrestua dhe më tej një tjetër deputet i vendosur po prej tij u arrestua për aferën e inceneratorëve, Ndonëse komisioni hetimor provoi në sy të shqiptarëve lidhjet okulte të anëtarëve të qeverisë dhe gjithashtu procedurat korruptive që ka ndjekur Grupi Strukturuar Kriminal në lidhje me inceneratorët në Elbasan, Fier dhe Tiranë, Rama thotë do ti vazhdoj pagesat! Me gjithë këto prova të qarta në dritën për diell kryeministri vazhdon të sillet si i paditur duke përdorur alibi qesharake për të paguar ende me taksat e shqiptarëve vjedhjen e shekullit prej 430 mln eurove. Ai vazhdon të refuzojë ndërprerjen e pagesave megjithëse asnjë gjykatë në botë nuk do të ndëshkonte vendin tonë në një rast si i inceneratorëve. Por ai Arbitrazhin e përdor sot si alibi për të frikësuar qytetatët dhe për të vazhduar pagesat në kurriz të tyre. Një qeveri që mendon për njerëzit në këtë kohë krize për më tepër, duhet t’i kishte ndërprerë të gjitha pagesat për një kontratë korruptive. Vetëm një qeveri e paaftë apo një qeveri tejet e korruptuar këmbëngul në alibi të tilla si kjo që dëgjojmë nga Rama”, tha Tabaku.
Deputetja demokrate i bëri thirrje SPAK të thellojë hetime për të parë fytyrën e vërtetë të qeverisë, ndërsa shtoi se nga 13 dhjetori i vitit të shkuar deri më tani janë paguar 2 mln euro për incneratorin e Tiranës dhe Fierit.
