Ish presidenti Ilir Meta, në mbledhjen e parë të Komitetit Organizativ të Partisë së Lirisë, u ka bërë të ditura anëtarëve tre drejtimet në të cilat do të punohet në vijim.
Ndërsa nuk e kurseu zhgënjimin që LSI u bë palë me Lulzim Bashën për djegien e mandateve, Meta, tha se tre drejtimet në të cilat Partia e Lirisë do të punojë tashmë janë revolucioni anti-korrupsion, organizimi i partisë duke u hapur dhe përgatitja për qeverisje.
“Të gjithë kundër i pati, edhe ju për fat të keq se i dhatë besën Lulushin për të djegur mandatet. Në Partinë e re të Lirisë kemi përsëri shqiponjën se jemi popull luanësh, shqiponjash. Do të punojmë në tre drejtime: revolucioni anti-korrupsion, organizimi i partisë duke u hapur dhe e treta, qeverisa e vendit, përgatitja. Dy të parat do të jenë detyrat kryesore, përgatitja për qeverisjen do të jetë e imja e Neshos, e shumë ekspertëve që do të bashkohen në këtë ndërmarrje të rëndësishme. Keni qeveri prej letre që ka dhunuar një popull zemër luan e sy shqiponjë, një popull ilirësh, por siç e kam paralajmëruar indirekt e direkt qeveria kur ra nga korrupsioni i paparë e veprimet antikombëtare kishte zënë përfundi Lulushin që u përpoqët aq shumë ta bënit kryeministër, që ishte shitur e infiltruar prej kohësh për ta bërë fake opozitën që ndante fitimet dhe përfitimet me mafien në pushtet. Tani kohët kanë ndryshuar, nuk kam ardhur në ish partinë e vjetër por u kam thirrur të gjithëve aty ku isha që në 2 mars me popullin e Kushtetutës dhe popullin e lirisë”, tha Meta.
