Drejtoria e Përgjithshme e Gjendjes Civile ka vijuar mbledhjen e të dhënave për adresat e reja.
Disa familje kanë plotësuar formularët e shpërndarë më parë dhe nuk humbin kohë me grupet e intervistimit, thjesht e dorëzojnë atë.
Drejtori i Gjendjes Civile në Ministrinë e Brendshme, Bledar Doracaj bën me dije se në rast refuzimi, grupet e intervistimit do të kontaktojnë strukturat e policimit në komunitet për të bërë të mundur identifikimin e dyerve që nuk hapen, ashtu sikundër për të zbatuar ligjin dhe për të detyruar personat që refuzojnë, pasi është detyrim ligjor deklarimi i adresës.
Por pasi qytetarët kanë mësuar adresën e re duhet të shkojnë ta deklarojnë atë pranë zyrave të gjendjes civile në njësinë administrative ku banojnë.
Pas datës 28 korrik ata të cilët nuk kanë deklaruar adresën e re ndëshkohen me gjobë deri në 10 mijë lekë. Sipas Doracajt, ndryshimi i adresës nuk shkakton probleme në hipotekë pasi të dhënat azhornohen ndërmjet institucioneve.
