Trupat e pajetë të 45 udhëtarëve të cilët humbën jetën në aksidentin tragjik në autostradën “Struma”, në afërsi të qytetit të Pernikut në Bullgari kanë mbërritur në aeroportin e Shkupit me dy avion transportues luftarak.
Ndërkohë Ministri i Jashtëm, Bujar Osmani, nëpërmjet një statusi në facebook njoftoi se pas transportit në aeroportin e Shkupit, me kërkesë të disa familjarëve, kufomat do të dërgohen në shtëpitë e tyre ose në varreza.
Më herët, Ministria e Punëve të Jashtme ka njoftuar se viktimat do të priteshin me homazhe në ‘Sheshin Skënderbeu” në Shkup ku do të vendoseshin edhe kurora me lule në nder të tyre.
Ndërsa i gjithë procesi i mbërritjes së viktimave nga aeroporti i Shkupit do të bëhej live nëpërmjet një ekrani gjigand po në këtë shesh.
Por mesa duket, familjarët e tyre nuk kanë qenë dakord me këtë agjendë shtetërore dhe kanë kërkuar që trupat t’u dorëzohen direkt familjarëve.
Në ceremoninë mortore morën pjesë edhe disa nga udhëheqësit institucionalë të vendeve të Ballkanit.
45 persona, shumica shqiptarë, humbën jetën mbrëmjen e 23 nëntorit në aksidentin që ndodhi në perëndim të Bullgarisë.
Mes viktimave pati edhe fëmijë, ndërsa u shpëtuan vetëm 7 persona, të cilët dolën nga pjesa e pasme e autobusit. Nuk dihet ende shkaku i saktë i aksidentit.
