Ishte zhdukur pa lënë gjurmë prej shtatorit të vitit 2017. Ndërsa sot nga policia mëson se trupi i pajetë që u gjet në periferi të Fierit i përkiste djalit të tij, Kreshnikut, i cili sipas policisë është vrarë nga shoku me të cilin ndante qeranë e shtëpisë, 32 vjeçari, Albert Zekaj.
Në një prononcim për mediat babai i viktimës, Mystahek Beqiraj tregon se autorin e dyshuar të krimit Albert Zekajn, e kishte pasur si djalin e tij dhe se ai kishte qënë edhe në shtëpinë e tyre.
“Kreshniku dhe Alberti që e vrau janë njohur në burg, në Belgjikë. Ata jetonin me qera në Fier më pas, por Alberti nuk e paguante qeranë. Ai nuk punonte dhe shtëpinë me qera e mbante vetëm djali im. Kreshniku më kishte thënë se do ta nxirrte nga shtëpia. Djali punonte bojaxhi dhe lyente makinat në një pikë servisi. Ma ka vrarë djalin në gjumë. Nuk e kisha menduar kurrë se do ta vriste. Por nëse drejtësia nuk e bën punën e vet, do ta bëjmë ne”, kërcënoi burri i moshuar.
