Shefi i kabinetit të kryetarit të BDI-së, Artan Grubi, ka deklaruar se për herë të parë në Maqedoni, kryetari i Kuvendit do të jetë shqiptar, i cili do të dalë nga radhët e BDI-së.
Grubi, sqaroi se kjo marrëveshje u arrit mes partnerëve të ardhshëm të koalicionit qeveritar, LSDM dhe BDI, për formimin e institucioneve të Maqedonisë.
Në koordinim me grupet parlamentare janë tejkaluar dallimet mes subjekteve parlamentare në Maqedoni, ku kanë rënë dakord me përbërjen e Komisionit për Emërime dhe Zgjedhje, komision që do të udhëhiqet nga VMRO-DPMNE-ja.
Pas konstituimit të Kuvendit do të procedohet me zgjedhjen e kryetarit të tij. Mediat në rajon shkruajnë se, përmes burimeve të ndryshme është mësuar edhe emri i kryetarit të ardhshëm të Kuvendit të Maqedonisë, e duket se bëhet fjalë për deputetin Talat Xhaferi.
Ndërsa presioni perëndimor rritet gjithnjë e më shumë mbi Maqedoninë për të formuar institucionet dhe për t’i dhënë fund krizës, BDI-ja dhe LSDM-ja vendosën që të vijojnë procedurat për të anashkaluar presidentin Ivanov dhe për të vazhduar me krijimin e Kuvendit.
