Ministri i Drejtësisë Ulsi Manja në një konferencë për shtyp deklaroi se zyrtarë të lartë të trajtimit të pronave janë të përfshirë në korrupsion, ndërsa shtoi se ka firmosur kallëzim penal për zyrtaren më të lartë të Pronave. Mësohet se, Manja, në cilësinë e koordinatorit kombëtar kundër korrupsionit, do të dorëzojë në SPAK kallëzim penal për drejtoreshën e Agjencisë së Trajtimit të Pronave, Jonida Baçi.
Teksa ka dhënë detaje për skemën e korrupsionit të zbardhur nga hetimit disa mujor nga njësia Antikorrupsion, Manja ka shtuar se është koha që SPAK të hetojë.
“Pas një hetimi të gjatë, rezulton se zyrtarja më e lartë e agjencisë së trajtimit të pronave dhe disa drejtues rezultojnë të implikuar në veprimtari abuzive përmes skemave që kanë prodhuar korrupsion thelbësor. Kam firmosur kallëzimin që do t’ia drejtoj SPAK. Është radha e SPAK-ut të thellojë hetimet e veprimtarisë së këtyre individëve dhe të zbardhë deri në fund skemat abuzive të vëna në veprim në shkelje të ligjit e në kurriz të qytetarëve. Janë dy skema të dokumentuara nga ana jonë, ku zyrtarët janë përfshirë në abuzim pronash. Ish pronarët që disponojnë vendimet e komisionit të kompensimit të pronave, i disponojnë këto vendime për një kohë të gjatë. Pas një hetimi të gjatë të kësaj njësie, zyrtarja më e lartë e Agjencisë së Trajtimit të Pronave, drejtori i kompensimit financiar në këtë agjenci dhe një zyrtar tjetër, rezultojnë të implikuar në veprimtari abuzive përmes skemash abuzive, të cilat dyshohet fort se kanë prodhuar korrupsion domethënës”, tha Manja.
Manja tha se skema e parë e korrupsionit që përfshin zyrtarët e lartë të Agjencisë së Trajtimit të Pronave është ajo kur ish pronarët që kanë për të përfituar kompensim fizik, pasi dështojnë ta marrin atë për vite me radhë, detyrohen ta shesin vendimin te sekserët, të cilët e realizojnë kompensimin brenda një kohe të shkurtër.
