Kandidati i Lëvizjes Vetëvendosje në Shqipëri, Boiken Abazi ka bërë një akuzë të fortë këtë të enjte, duke u shprehur se numëruesit që ndikojnë në manipulimin e votave i kanë krahët e ngrohta nga lart, pasi ndryshe nuk do të kishin vepruar aq të lirë.
“Kanë kaluar shumë ditë, javë. Nuk është marrë asnjë masë. Ata që janë kapur në flagrancë ndoshta sot kanë marrë e shpërblim për punën e shkëlqyer që kanë bërë. Në video duket se ndihen shumë të lirë. Kjo nuk mund të bëhej pa bashkëpunim.”, tha Abazi.
Boiken Abazi vuri theksin tek heshtja, që sipas tij ka pllakosur pas publikimit të videove. Sipas tij, minimalisht partitë duhet të ishin distancuar.
“Kjo databaza e patronazhimit tregon që kemi një demokraci të kontrolluar nga mafia. Në këto 30 vite, një kalim nga diktatura te liberalizimi i krimit. Ajo databaza është simptomë e patronazhimit strukturor kriminal në Shqipëri… Heshtja që ka pllakosur që prej se në kemi shpërndarë këto video, partitë, SPAK…Kjo tregon se kjo shkon deri lart, ata e kanë mbrojtjen nderi lart. Nëse këta nuk bëhen shembuj, pse të dalin njerëzit të votojnë?” deklaroi ai.
Abazi nuk lë pa përmendur as ndërkombëtaret, për të cilët u shpreh se me demek luajnë arbitrin por nuk kemi dëgjuar asnjë fjalë nga ta për temën e manipulimit të votave.
“Edhe komuniteti ndërkombëtare po hesht. Me demek ata luajnë arbitrin. Pse nuk kemi dëgjuar asnjë fjalë nga asnjë ambasadë?” tha Abazi.
