Deputeti i Partisë Demokratike, Luan Baçi ka reaguar ashpër pas deklaratave të pakuptimta të një pjese të deputetëve të cilët kërkojnë që të largohet nga drejtimi i partisë edhe Basha edhe Berisha. Në postimin e tij, Baçi i ka quajtur ‘grupimi Brava’ dhe i ka kërkuar të jenë të sinqertë me demokratët dhe të mos bëjnë lojë me të tilla deklarata pasi kurrë nuk do të keni më falje.
“Mbledhja e grupit parlamentar te grupimit Brava, një pjesë e tyre me propozimet e trasha që bëjnë, të fyejnë inteligjencën! E para! Kush jeni ju, qe u vini kushte demokrateve që janë shumicë dërmuese? Kush jeni ju që vini kushte se kush duhet të hyjë në garë dhe kush jo? Për çfarë grupe përfaqësimi e keni fjalën? Ka një PD dhe komisioni i rithemelimit bën drejtimin e saj në këtë periudhë, bëhuni pjesë e procesit që ka filluar dhe këtu mbaron historia! PD është e bashkuar, dhe këtë e treguan zgjedhjet e pjesshme lokale, ku Brava edhe ato vota që mori, ishin vota si marzh gabimi për siglën, që e mban Brava padrejtësisht edhe pse shumë deputete ishin pjesë aktive e fushatës së kandidatëve të Bravës!” – shkruan Baçi.
Baçi gjithashtu u kërkon deputetëve që të tregohen serioz dhe të sinqertë me demokratët me qëndrimin që do të mbajnë në mënyrë që të falen.
“Brava është shkarkuar në kuvendin e 11 Dhjetorit dhe vendimi është ratifikuar në referendumin e 18 Dhjetorit si asnjëherë më parë! Partia Demokratike është në proces zgjedhor dhe në 30 Prill ka kuvendin e saj. Për arsyen se ishim në zgjedhjet e pjesshme lokale, kuvendi i përcaktuar në 22 Mars u shty, për datë 30 Prill dhe i jepet shansi kujtdo të hyjë të garojë, për çdo pozicion, Bashës dhe kujtdo tjetër që dëshiron! Nuk është jo vetëm demokratike, po as logjike të kërkosh të përjashtosh nga votimi çdokënd që ka të drejtën të votojë! Tregohuni serioze dhe të sinqertë me demokratët, me qëndrimin që mbajtët tani, ju falën ca nga mëkatet e deritanishme, në qoftë se vazhdoni të bëni lojë, dijeni mirë se kurrë nuk do të keni më falje! ” – përfundon Baçi.
