Nga Luljeta Progni
Zemërim ekstrem ka shpërthyer në rrjetet sociale menjëherë pasi emisioni “Stop” publikoi një video-skandal ku një edukatore dhunonte barbarisht një fëmijë. Është një ngjarje shumë e rëndë për të cilën reagimi me kaq zemërim del nga brendësia e çdo njeriu normal.
Një edukatore monstër e rrah dhunshëm një fëmijë tre-vjeçar në atë mënyrë që nuk mund të të shfaqet as në ëndrrën më të keqe. Por ja që ka ndodhur dhe i dhunuari është një fëmijë veçse tre vjeç krej i pafuqishëm për t’u mbrojtur. Autorja e dhunës është Anjeza Shabani, e cila ka qenë gazetare në një emision investigativ të ngjashëm me emisionin që zbuloi skenat e saj të shunës.
Ajo që duket në pamje të parë është sjellja anormale e një njeriu me probleme të rënda mendore. Autorja shfaqet si një skizofrene. Të gjithë duan të kryqëzojnë Anjezën dhe kjo është normale, por në fakt ajo është veçse një rast dhe për fat të keq është produkt i shoqërisë tonë të mbushur me dhunë e kaq monstra.
Për fat të keq kjo nuk është e vetmja, pasi para pak muajve kjo ngjarje u përsërit në mënyrë po kaq të rëndë në Shkodër e Durrës. Me siguri ka të tjera raste po kaq të dhunshme që ne nuk i dimë, sepse nuk kanë arritur të shfaqen në ekranet tona. E sigurt është se ka shumë “Anjeza” që po merren me edukimin e këtij brezi të ri të Shqipërisë. Ky është fataliteti.
Në këtë rast, bëhet fjalë për një institucion privat të arsimit. Ministrja e arsimit Lindita Nikolla doli sot e tha se: “nuk mund të rrimë pas çdo dere pallati a biznesi privat”, duke pranuar si pa të keq se kopshti ku është dhunuar fëmija 3-vjeçar nuk ishte i regjistruar. Është detyrë e kësaj ministrie të kontrollojë këto institucione. Ministrja duhet të dalë e të na thotë se sa herë janë kontrolluar këto institucione private të arsimit në Shqipëri bashkë me ato publiket, ku her pas here shfaqet dhuna ndaj fëmijëve. Kryeministri Rama të dalë sot e të na thotë se cili është niveli i institucioneve private të arsimit në Shqipëri dhe sa herë janë kontrolluar në këto tri vite nga institucionet që ai drejton.
Është fakt se në tre-katër muajt e fundit janë publikuar në media raste të shumta skandalesh me keqtrajtimnin e fëmijëve nëpër isntitucionet shtetërore të arsimit, siç ishte jetimorja në Durrës dhe jetimorja në Shkodër. Janë të paktën tri raste shumë të rënda të keqtrajtimit të fëmijëve në jetimoren e këtyre dy qyteteve. Rasti ekstrem është i dyti në Shkodër ku fëmijë të mitur përveçse janë dhunuar fizikisht, janë dhunuar edhe seksualisht në mënyrë të vazhdueshme për disa vite. Si zakonisht ngjarja irritoi opinionin publik për disa orë dhe kaq. U arrestua stafi drejtues i jetimores së Shkodrës dhe siç e do zakoni në Shqipëri çështja po hetohet “avash-avash” nëpër nivelet e drejtësisë për të mbërritur po siç e do zakoni në finale, atje ku i akuzuari ia del gjthmonë të lirohet për mungesë provash. Shpresojmë se nuk do të ndodhë me këto raste, sepse zullumi i monstrave që prodhon kjo shoqëri ku mungon drejtësia e insitucioneve shtetërore, është shtuar së tepërmi.
Ku e marrin guximin këta njerëz që vazhdojnë të ushtrojnë dhunë ndaj fëmijëve pa përfillur aspak ndëshkimin e ligjit. Mos do të thotë kjo se askush nuk ka frikë askënd dhe mund të bëjnë ç’të duan përsa kohë që korrupsionin në insitucionet shtetërore e kanë avokatin më të mirë?
Mund të bëhesh deputet edhe pse ke qënë kriminel, mund të bëhesh drejtor edhe pse ke patur si të vetmin aktivitet të jetës prostitucionin dhe trafikun e drogës, mund të bëhësh ç’të duash e të dalësh në krye të shoqërisë mjafton të jesh i fortë e t’i sjellësh vota partisë një herë në katër vjet. Bashkë me votat sigurisht edhe përfitime të tjera që prodhon ky sistem i korruptuar kokë e këmbë.
“Të fortët” nuk kanë frikë të thyejnë ligjin. Kush është më i forti nuk ka frikë të godasë të dobëtin, jo se nuk ekziston ligji por se llumi ka dalë në krye të shoqërisë dhe i ka rënë për pjesë ta zbatojë ligjin. Llumi ka rregullat e veta. Në krye të moçalit del prap më i forti. Ky është modeli që na promovoi “Rilindja” në këto tre vjet. Jo se nuk kishte ekzistuar më parë ky model, por u përforcua aq shumë sa njerëzit normalë, taksapaguesit e rregullt e qytetarët e Shqipërisë janë strukur nëpër qoshet e tyre, të trembur e të pafuqishëm as për të mbrojtur fëmijët e tyre. Llumi ka marrë revansh e nuk ndalet.
