Zgjedhjet vendore të vitit 2015 vendosën një standard të paarritur më parë. Partitë politike ranë dakord që në listat e kandidatëve për këshilltarë bashkiakë, kuota gjinore të arrinte barazi të plotë. Sot këshillat bashkiake përfaqësohen 50% nga gra dhe 50% nga burra.
Kuota prej 50% e grave në këshillat bashkiake nxiti gratë në politikë të kërkonin më shumë hapësira në Kuvendin e Shqipërisë. Deputetja socialiste Olta Xhaçka, në maj të vitit 2016 depozitoi në Kuvend nismën ligjore që të bëhet pjesë e Kodit të ri Zgjedhor ku kërkon kuotën 50% për gratë në listat e deputetëve për zgjedhjet e 18 qershorit.
Për deputeten socialiste kjo kuotë sfiduese nuk do të jetë e lehtë për t’u realizuar, kur dimë se 4 vjet më parë partitë politike shqiptare anashkaluan dhe gati e refuzuan në disa qarqe kuotën gjinore prej 30%.
Në zgjedhjet parlamentare të vitit 2013, partitë politike për shkelje të kuotës gjinore 30% paguan në Komisionin Qendror të Zgjedhjeve të gjitha bashkë 22 milionë lekë të reja gjobë.
