Gjykata e Tiranës liroi sot ish deputetin e PD-së Klevis Balliu dhe disa prej banorëve të Unazës së Re, të cilët u arrestuan nga policia ditë më parë.
Para gjykatës ishin grumbulluar ish deputetë të opozitës dhe banorë që preken nga projekti i Unazës së Madhe, ndërsa mes tyre edhe ishte edhe ish deputetja Oriola Pampuri.
Përballë gazetarit Ermal Rizai, ish deputetja e PD u shpreh për syri.net se arrestimi i Balliut ishte politik, por dhuna shtetëtërore e ushtruar ndaj banorëve dhe jo vetëm do të kthehet në forcë.
“Arrestimi i Klevis Balliut sigurisht që është arrestim politik. Ne dhe banorët e Unazës kishim gëzim të jashtëzakonshëm që ata nuk u dënuan por kjo nuk ka vend për ta thënë sot sepse ata nuk duhet të ishin fare aty. Ata janë banorë që dalin për të mbrojtur strehën e tyre, shtëpinë e tyre prej 6 muajsh dhe e kanë mbrojtur në shi, në të ftohtë, me fëmijë, me të moshuar, gra, burra, kanë ndejtur aty prej 6 muajsh. Dhe krah tyre ka qëndruar edhe ish deputeti Klevis Balliu, që nuk ka munguar një ditë të vetme, së bashku me mua, që i kemi mbështetur këta banorë dhe të gjithë ish-deputetët.”- tha Pampuri.
Ish-deputetja tha se të gjithë bashkë do të vijojnë aksionin, madje më të fortë se 6 muaj më parë.
“Me këtë qeveri dhe me këtë kryeministër asgjë nuk parashikohet. Dhe të themi që vendi i tyre ishte sot në bankën e të akuzuarve, edhe këtë nuk mund ta shikoja dot. Të gjithë bashkë do të vijojmë aksionin, madje më fortë se 6 muaj më parë, dhe nuk i frikësohemi asgjëje”, u shpreh ish-deputetja Pampuri.
Çfarë do të thotë më fortë se 6 muaj më parë?
“Do të jemi më të bashkuar. Nuk do të ketë asnjë që do të synojë përçarjen, dhe as nuk do të tentojë të prekë shtëpitë e këtyre banorëve. Këta banorë do të kenë në krah të tyre ish deputetët e opozitës dhe janë të bashkuar. Gjithë kjo dhimbje dhe ky trishtim i 3-4 ditëve të fundit do tu kthehet banorëve në forcë për tzë kundërshtuar këtë qeveri që nuk e njeh ligjin”, u shpreh Pampuri për Syri.net.
