Kryetari i Partisë Demokratike, Sali Berisha ka komentuar nismën e marrë nga deputetët socialistë, për të përjashtuar nga Kuvendi të gjithë politikanët që kanë patur lidhje me komunizmin.
Një nga gazetarët e pyeti për atë që ai e cilëson si ligji “anti-Berishë”, ndërsa kryedemokrati theksoi se nuk i druhet aspak një ligji që ka të bëjë me sigurimin e shtetit apo dhe për “non gratat”.
Pyetje: Z. Berisha, ju thatë se ligji që socialistët pretendojnë ta kalojnë në Kuvend në shtator për dekriminalizimit, në fakt ishte projekt për të lënë Metën jashtë Kuvendit, pasi një nga pikat ishte të linin jashtë Kuvendit personat që kishin lidhje me ish-Sigurimin. Por një pjesë tjetër e këtij projektligji është të mos lejohen të kandidojnë dhe të mbajnë poste të rëndësishme, personat e shpallur non grata nga SHBA apo shtetet e BE. Si do të veproni në rast se ky projektligj do të kalojë në Kuvend?
Sali Berisha: Berisha: Në një tekst që kam parë unë kjo nuk ekziston, por nëse dëshirojnë i ftoj ta bëjnë. Nuk kam asnjë lloj. Ka standarte europiane të qarta, ka rezoluta Parlamenti Europian për të gjitha këto. Në qoftë se do të bëjnë një ligj anti-Berishë, ta provojnë! I siguroj se vrulli dhe hovi vetëm do të rritet. Në ligj, që të jemi saktë, në draftin e tyre që ma kanë sjellë bashkëpunëtorët e mi, ata kanë “Lustracionin”.
