Një person është gjetur i vrarë me armë zjarri të enjten pasdite në Lezhë. Ngjarja ka ndodhur në Balldre, në rrugën e vjetër, ku është gjetur i pajetë në makinë një i ri, rreth 25 vjeç.
Viktimë ka mbetur Romario Brunga.
Fotografia tregon vendin e ngjarjes teksa policia ka rrethuar me shirit skenën e krimit. Pak metra më tej dallohet makina “Benz” ku u gjet personi i pajetë.
Hetimet janë në vijim për të përcaktuar nëse kemi të bëjmë me vrasje apo vetëvrasje.
Në një njoftim paraprak, policia lokale tha se automjeti nuk ka dëmtime të jashtme nga armë zjarri, ndërsa viktima ka vetëm një plagë të shkaktuar nga armë zjarri.
Në mjet raportohet se është gjetur një pistoletë dhe një gëzhojë.
“Në rrugën e vjetër të Balldrenit është gjetur i pajetë brenda në automjetin e tij, shtetasi R. B., rreth 25 vjeç. Nga veprimet e para të kryera në vendngjarje nga grupi hetimor, është gjetur brenda në automjet një armë zjarri, tip pistoletë, dhe një gëzhojë. Po nga veprimet e para, rezulton se automjeti nuk ka dëmtime të jashtme nga armë zjarri, ndërsa viktima ka vetëm një plagë të shkaktuar nga armë zjarri. Grupi hetimor, nën drejtimin e Prokurorisë, vijon veprimet intensive në vendngjarje për zbardhjen e plotë të rrethanave dhe dokumentimin ligjor të ngjarjes, për të përcaktuar nëse kemi të bëjmë me vetëvrasje apo me vrasje”, thuhet në njoftimin paraprak të policisë.
