Kandidati i Lëvizjes Vetëvendosje në qarkun e Tiranës, Boiken Abazi, me anë të një postimi në rrjetet sociale ka publikuar videon se si anëtarët e Grupit Numërues të Votave, vendosin sipas dëshirës shenja “X” në fletët e votimit gjatë procesit të numërimit.
Vetëvendosje ka publikuar pamjet filmike të kamerave 360 gradë që kemi siguruar nga KQZ-ja.
Gjithashtu Vetëvendosje shkruan në Facebook se pavlefshmëria dhe përsëritja e zgjedhjeve është standardi minimal për të nisur rimëkëmbjen e demokracisë.
Postimi i plotë
Ende asnjë masë nuk është marrë për këtë krim elektoral
Në qytetin e Tepelenës, në Pallatin e Kulturës Tepelenë, saktësisht KZAZ Nr.79, në datën 26.04.2021, është konsumuar kjo vepër penale në bashkëpunim mes gjithë anëtarëve të Grupit Numërues të Vendit të Numërimit të Votave, të cilët kanë vendosur sipas dëshirës shenja “X” në fletët e votimit gjatë procesit të numërimit.
E kemi denoncuar edhe më herët këtë vepër penale, me një tjetër video amatoriale në datën 26 prill 2021. Kësaj radhe po nxjerrim pamjet filmike të kamerave 360 gradë që kemi siguruar nga KQZ-ja. I njëjti material filmik është depozituar edhe mbrëmë si provë në ankesën e dorëzuar nga Kandidati i Pavarur Kreshnik Merxhani në KQZ/KAS.
Ne kërkojmë marrjen e menjëhershme të masave administrative nga KQZ-ja dhe ndjekjen penale të menjëhershme për këtë rast nga organet e drejtësisë. Pavlefshmëria dhe përsëritja e zgjedhjeve është standardi minimal për të nisur rimëkëmbjen e demokracisë.
Tiranë, 11 maj 2021
Lëvizja VETËVENDOSJE!
Qendra në Shqipëri
Tiranë.
