Lefter Koka, është “qeni” më i ri që i ka dalë përballë “karvanit” të Edi Ramës. Një ditë më parë, ministri i LSI-së, Lefter Koka, akuzoi policinë e shtetit për kanabizimin e Shqipërisë, ndërsa përgjigja e Ramës është ajo e zakonshmja: “Qentë le të lehin, karvani do shkojë përpara”.
Një ditë më parë ministri Lefter Koka tha: “Do të kërkoja t’i bëja thirrje në fakt eksponentëve të Policisë së Shtetit që mos të ikë në drejtim të paduhur. Drejtimi i duhur është të ruajnë rendin. Po shohim këtë fenomen të rëndë, ku po bëhemi gazi i Europës me sasinë e kanabisit të mbjellë në territor dhe këto fenomene kanë bërë që të ketë pasur edhe reaksione, siç ishte zoti Manjani. Detyra e policisë është të parandalojë një krim dhe jo më mos jetë në gjendje të parandalojë dot rritjen e një bime. Janë qindra punonjës të policisë që paguhen nga taksapagues shqiptarë dhe nuk duhet të jenë tutorë disa të fortë në qytete të ndryshme.”
Në përgjigje të ministrit të LSI-së, kryeministri Rama shkruan sot: “Pas anketimit të bërë disa muaj më parë nga Komisioni Europian, Policia e Shtetit konfirmohet përsëri si institucioni më i besuar i shqiptarëve në Indeksin e Besimit tek institucionet.”
