Ish-ministri i Mjedisit, Lefter Koka, i është drejtuar gjykatës së Posaçme me kërkesë për zëvendësim të masës së sigurisë. Koka, ndaj të cilit rëndojnë dy masa sigurie arrest me burg, për inceneratorin e Elbasanit dhe atë të Fierit, ka kërkuar zëvendësim të masës së sigurisë për këtë të fundit. Kërkesa do shqyrtohet në muajin shtator nga Gjykata e Posaçme, që do vendosë nëse do e pranojë apo jo kërkesën e Kokës për masë më të butë sigurie për inceneratorin e Fierit.
Koka i është drejtuar gjykatës për zëvendësim mase me argumentin se ai është në gjendje të rendë shëndetësore, pasi vuan nga zemra. Aktualisht ai është në spitalin e burgut. Një tjetër argument për masë më të butë, është bërë me pretendimin se ai nuk ka përgjegjësi për shpronësimin, pasi dokunentacioni është përgatitur nga ekspertët e ministrisë së mjedisit.
Nga ana tjetër SPAK pretendon se, Koka ka përfituar përmes ryshfetit 1.2 milionë euro për ndërtimin e Inceneratorit të Fierit, e për këtë shkalla e parë ka caktuar masën sigurisë “arrest me burg”. Koka akuzohet edhe për Inceneratorin e Elbasanit që sipas prokurorisë ish ministri ka marrë ryshfet 3.7 mln euro për ndërtimin e tij. Ndaj ish ministrit të Mjedisit rëndojnë tre akuza, ajo e “Korrupsionit”, “shpërdorimit të detyrës” dhe ajo e pastrimit të parave”. Lefter Koka u arrestua më 14 dhjetor me urdhër të SPAK për çështjen e inceneratorit të Elbasanit, ndërsa më pas SPAK kërkoi ndaj tij masë arrest me burg pasi dyshohet si i përfshirë edhe në inceneratorin e Fierit.
