Lana merr me vete instalacionin e Erion Veliajt

Autobusi instalacion i kryetarit të Bashkisë së Tiranës, Erion Veliaj është përmbytur sot pasdite nga prurjet e lumit Lana. Autobusi përfundoi në Lanë dy muaj më parë gjatë një aksidenti me një makinë tjetër pranë ish-kinema “Agimi”. Pas propozimit të kryebashkiakut, mjeti i transportit publik qëndronte aty në formë instalacioni, si shenjë sensibilizimi për aksidentet rrugore në kryeqytet. Në fakt, kryebashkiaku e paraqiti këtë edhe si një atraksion turistik.

Por moti i keq s’e kurseu as instalacionin. Siç shihet në foton e siguruar nga Gijotina.com, objekti nuk është më një atraksion, por duket i mbushur plot me ujë. Reshjet e dendura të shiut që përfshinë vendin këto dy ditët e fundit shkaktuan përmbytje në lagje të ndryshme të Tiranës dhe më pas ndërprerje të energjisë elektrike. Sjellim në kujtesë që edhe lumi Lana doli nga shtrati dhe përmbyti zona si “Pallati me Shigjeta” etj. Të shohim se çfarë do të bëjë Veliaj me objektin.