Gjykata e Tiranës ka vendosur masën e sigurisë “arrest me burg” për 29 vjeçarin e identifikuar me emrin Eriban Daja i cili u gjet brenda “shtëpisë së barit” në Ndroq. Në “arrest shtëpie” janë lënë faturisti Erjon Mema dhe elektricisti Qemal Hasa.
Laboratori i drogës u zbulua 2 ditë më parë. Në kuadër të operacionit “Pinet” është zbuluar ambienti i përshtatur për kultivimin e kanabisit, me anë të llambave, në një banesë ku kishte lidhje të paligjshme elektrike.
Në pranga u vunë 3 persona, njëri prej tyre është kapur brenda “shtëpisë së barit”. Dy të tjerët janë punonjës të OSHEE-së, Qemal Hasa, elektricist, Erion Mema, faturist. Gjithashtu është proceduar penalisht kryeplaku i fshatit Elez Kapllani dhe një punonjës policie SPZ, Adrian Malliku. Në kërkim është shpallur organizatorja e kësaj veprimtarie, Rudina Xhambazi, 32 vjeçe, e cila kishte marrë banesën me qira.
Sipas policisë Xhambazi në shtëpinë e marrë me qira prej saj, së bashku me Eriban Dajan i cili u kap brenda gjatë ndërhyrjes së Policisë, e kishin banesën përshtatur për kultivimin e bimëve narkotike me anë të llambave, ndërsa punonjësit e OSHEE, nuk kanë konstatuar lidhjet e paligjshme të energjisë elektrike në këtë ambient, në zonën që ata kishin në monitorim.
Gjatë operacionit janë sekuestruar 247 bimë kanabis të kultivuara në vazo, 45 ushqyes elektrikë, 46 llamba elektrike, 11 freskuese, shuma prej 120.000 lekë të rinj dhe 7 aparate celulare.
