Ditën e sotme në Kuvend, në seancën që do të zhvillohet në orën 17:00, kryeministri Edi Rama pritet që të marrë besimin e të tijve dhe për postin e minstrit të jashtëm.
Përveç mbylljes së ciklit të ndryshimeve në Qeveri, socialistët kanë caktuar edhe ata që do të zënë vendet e lëna bosh në komisionet parlamentare, nga ata që u bënë pjesë e Këshillit të Ministrave.
Në vend të zv.kryeministrit Erion Braçe, Komisionin e Ekonomisë dhe Financave do ta drejtojë ish-ministri i Financave, Arben Ahmetaj. Ish-ministri i Bujqësisë, Niko Peleshi pritet të marrë drejtimin e Komisionit të Veprimtarisë Prodhuese, në vend të Eduard Shalsit.
Ministri i ri i Bujqësisë, Bledi Çuçi lë bosh dy detyra parlamentare, atë të bashkëkryetarit të Reformës Zgjedhore, ku do të zëvendësohet nga Blerina Gjylameti, si dhe postin e zv.kryetarit të Komisionit të Integrimit, për të cilin ende nuk është caktuar zëvendësuesi. Dy kandidaturat më të mundshme janë ish-ministri i Jashtëm, Ditmir Bushati, ose deputeti Ervin Bushati.
Një tjetër vend që mbetet bosh është ai i numrit dy të Komisionit të Shëndetësisë, ku ministrja e re për Marrëdhëniet me Parlamentin, Elisa Spiropali pritet të zëvendësohet nga deputetja socialiste, Klodiana Spahiu.
/FAXWEB.AL/
