Kuvendi i Shqipërisë ditën e sotme ka fshirë nga faqja mbledhjen e Komisionit te Shëndetësisë, të drejtuar nga opozita.
Gjatë një reagimi për mediat, kryetarja e Komisionit të Shëndetësisë, Albana Vokshi tha se diskutimet në ditën e sotme nuk janë zhvilluar pasi në shkelje të Kushtetutës qeveria ka vendosur që Komisionet të zhvillohen online.
Vokshi tha se Rama po përpiqet që t’i mbyllë gojën opozitës duke vepruar me dy standarde.
Kryetare e Komisionit të Shëndetësisë, Albana Vokshi:
“Janë shkelur rregullat e Kushtetueses për të zhvilluar Komisionet online. Kërkoj të merren masa urgjente që sot kanë tentuar të “minojnë” parlamentarizmin dhe t’i mbyllet goja opozitës. Është e paprecedent që t’i mbyllin gojën opozitës. RTSH Kuvend kanë ndërprerë sinjalin për Komisionin e Shëndetësisë, sikur të jenë një televizion privat por ata paguhen nga taksat shqiptare. Na është fshinë nga gjithë faqet e Kuvendi, nga portali sikur ne nuk zhvillojmë seancë diskutimi. Rama ka frikë, janë mësuar me kukulla dhe fasadë. Kryeministri mashtron gjoja i shtrin dorën opozitës. Mazhoranca vepron me dy standarde, lejon aktivitete masive të qeverisë kurse opozitën e bllokon.
Shikoni Ramën pa maskë me qindra njerëz brenda një salle. Gjiknuri po ashtu pa maska dhe distancim social. Mbledhje e qeverisë pa maska, ku ndryshon nga ajo me Komisioni, pse Rama mbledh qeverinë dhe ne anëtarë të komisioni mos mblidhemi fizikisht? Një standard për mazhorancën që lejohet të zhvillojë aktivitete kurse opozitës nuk i lejohet të zhvillojë aktivitete. Rama ka frikë ne lirinë, nuk ja falim, ne do jemi aty do kërkojmë mbledhjet me prani fizike të deputetëve, administrata është e detyruar që të pranojë. PD do vijoj betejën e saj për të vijuar debatin në Komisione”, tha Vokshi.
