Nxënësit e Shkollës së Mesme në Manëz presin të rindërtohet shkolla, por Emiriana Sako bën pazar me biznesmenin Nuri Balla dhe nuk dihet se si do të shkojë zbatimi i projektit.
Bashkia Durrës ka zhvilluar tenderin me objekt “Ndërtim i ri gjimnazi Manëz, Njësia Administrative Manëz”. Në dokument theksohet se punimet në këtë shkollë do të bëhen nga Programi i Rindërtimit.
Por duhet ta themi që po shpenzohen 3.1 milionë euro për riparimin e shkollës, e cila është në gjendje të mirë. Aktualisht kjo shkollë ka 11 klasa me 388 nxënës, ka nevojë për risovatim, lyerje, ndërrim të dyerve, të bankave, si dhe do të bëhet një shtesë e re që do të funksionojë si palestër. Dhe sipas stafit të Sakos, për rregullimin e fasadës dhe të 11 klasave brenda objektit nevojiten 3.1 milionë euro.
Duke e krahasuar me shpenzimet e rindërtimit të shkollave të kësaj madhësie në Tiranë dhe në qytete të tjera, duket se fondi limit është fryrë nga komisioni i Sakos. Kur ta auditojë KLSH ndoshta mund ta marrim vesh me saktësi se si është përllogaritur ky fond dhe nëse është tej vlerës reale.
Pasi u konsultuam me specialistë të ndërtimit, gjetëm se me kaq para mund të ishte ndërtuar një shkollë nga e para, duke përfshirë palestrën dhe klasa shtesë për laboratorë!
Por, kryetarja Sako nuk e sheh në këtë këndvështrim. Etja për të përfituar dhe manipuluar tenderat nuk lë vend për logjikën ekonomike. Tenderi ka qëndruar i hapur për 20 ditë dhe është dorëzuar vetëm një ofertë. Bashkimi i operatorëve “DION-AL” & “ERGI”, me pronarë Elizabeta Nika dhe Nuri Balla qenkan të vetmit biznesmenë që mund ta merrnin përsipër këtë objekt! Të tjerët me siguri e kanë ditur se kush është fituesi dhe nuk janë afruar të humbin kohën me dokumentet e aplikimit.
Oferta është sa 100% e fondit limit dhe ndërkohë nuk kishte asnjë konkurrent tjetër përballë. Këto fakte duhet ta detyronin komisionin ta anulonte tenderin dhe ta riformulonte kërkesën. Megjithatë këto shkelje të ligjit të prokurimeve nuk e penguan kryetaren Sako që të shpallte menjëherë fituesin.
Open Data Albania ka ngritur për tenderin “Flamurin e Kuq”, që është shenja e riskut të korrupsionit. Kështu 3.1 milionë euro do të xhirohen tek llogaria Nuri Ballës, i cili është mësuar të favorizohet nga zyrtarët e tenderave. Ne kemi treguar më parë që Balla ka marrë para edhe nga torta e madhe e inceneratorit të Elbasanit. Në vitin 2022, Ballës i janë dhuruar 169 milionë lekë në tenderin që kishte si objekt për të siguruar automjetet që do të përdoren për shpërndarjen e mbetjeve brenda landfillit. Tenderin e zhvilloi “ECO ELB Sh.A”. Pjesëmarrës sipas dokumenteve ishte vetëm “ERGI” sh.p.k. që është shpallur edhe fitues.
Ky operator u zotua se do të siguronte mjetet që i duhen për transportin e mbetjeve të rënda, përfshirë dhe buldozerët për të shpërndarë mbetjet brenda landifllit. Kujtojmë se prej fundit të vitit 2021, Inceneratori i Elbasanit u sekuestrua nga SPAK pas hetimeve për korrupsion me koncesionin. Por pazaret vazhdonin edhe më pas, ku ka përfituar Nuri Balla.
Gjithashtu, kjo kompani është denoncuar edhe nga vetë deputetët e mazhorancës për tenderin 65.3 milionë lekë për mirëmbajtjen e rrugës Fier Shegan-Divjakë.
“ERGI” në bashkëpunim me një tjetër firmë në kontratë, nuk e kanë mirëmbajtur asnjë ditë të vetme rrugën duke e lënë atë në gjendje të mjerueshme. Kontrata e fundit ka nisur ne Gusht 2022 dhe ka patur zero mirëmbajtje nga ky grup kompanish nën kontratë, sipas denoncimit publik.
Tenderi për mirëmbajtjen me performancë të segmenteve rrugore Fier Shegan – Divjakë + K/Rr. Nacionale – Grabian + Strumë – Qafë Marinëz” u zhvillua në mars 2022. Në garë u paraqitën 5 oferta, por ARRSH shpalli fituese bashkimin e kompanive Ergi dhe BE-IS për vlerën 65.3 milionë lekë. Kontrata u lidh në gusht 2022 me afat 24 muaj. Kjo “punë” ka përfunduar në gusht të këtij viti, prandaj Balla i është përveshur projekteve të tjera.
Shpresojmë që kryetarja Sako dhe biznesmeni Balla të mos e zvarrisin rindërtimin dhe të mos e lënë pa bërë objektin, sepse nga ky moment nxënësit e kësaj shkolle nuk kanë ku të zhvillojnë normalisht mësimin.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
