Forcat e moderuara kryengritëse në Siri kanë marrë kontrollin e një qyteti strategjik në pjesën veriore të këtij vendi, nga militantët e Shtetit Islamik (IS).
Observatori Sirian për të drejtat e njeriut me seli në Londër, që ka rrjetin e vëzhguesve brenda Sirisë, njoftoi se kryengritësit e moderuar që luftojnë nën flamurin e Ushtrisë së re të Sirisë, kanë marrë kontrollin ndaj qytetit al-Rai pas përleshjeve të ashpra me militantët e Shtetit Islamik, gjatë ditës së djeshme.
Rënia e këtij qyteti është nxitje për kryengritësit, ndersa ata po luftojnë për marrjen e kontrollit në qytetin e ndarë Alepo.
Marrja e kontrollit në qytetin al-Rai pas disa ditëve të luftimeve të rënda, siguron një linjë të rëndësishme të furnizimit nga Turqia për kryengritësit.
Kjo ishte zmbrapsja e parë e militantëve të grupit ekstremist, Shteti Islamik, prej kur ata kanë arritur avancime madhore në këtë territor prej majit të vitit të kaluar.
