Kryeministria i refuzoi 4 herë pensionin special, kineasti Mit’hat Gagu: Jam vetësakrifikuar

Kineasti 84-vjeçar, Mit’hat Fagu po lufton për të fituar pensionin e posaçëm “Për rezultate të dallueshme në fushën e kulturës dhe arteve”. Në 3 dekada punë në ish-Kinostudio, Shqipëria ai la disa filma artistike si “Prita”, filma dokumentarë e një kontribut të çmuar në filmin vizatimor. Por e gjithë kjo ka mbetur pezull si shkak i Këshillit të Ministrave, që nuk po merr vendimin për kineastin 84-vjeçar.
““Më vjen shumë keq, ky përçmim që ndiej nga administrata shtetërore për figurën time, për kontributin tim që kam dhënë në kinematografinë shqiptare dhe që jam vetësakrifikuar…kam kërkuar të drejtën legjitime për pension të veçantë se jam shumë i vonuar pas 30 vjetëve. Ministria e Kulturës e aprovon emrin tim 4 herë radhazi, dhe 4 herë radhazi unë hiqem nga administrata e Kryeministrisë. Dhe kjo më vë pozicion të vështirë të them të drejtën. Sepse unë ëndërroj të kthehem në Shqipëri, por me atë pension qesharak, 11500 lekë nuk mund të jetoj sepse jeta në Shqipëri është shumë shumë e shtrenjtë!”, thotë kineasti.
Vitet e fundit Fagu ka ndjekur emrat që kanë përfituar këtë pension special, duke tentuar të kuptoj për shkaqet që e përjashtojnë vetë atë.
“Ka shembuj të tjerë që kanë bërë kërkesa si unë dhe e kanë marrë! Janë 15 emra çdo vit që aprovohen , mbesin 14, hiqet vetëm emri im. Fillova të hulumtoj për këta 14 të tjerët. Shumica ishin sportistë, një artistë, dhe një njeri që s’kishte bërë asgjë për këtë vend. Mos harrojmë që në diktaturë jam internuar dhe unë 12 vjet”, thotë Fagu.
Largimi nga ish Kinostudio në vitin 1973 pas filmit dokumentar “Në shtigjet e revolucionit tekniko-shkencor”, e të tjera peripecira që i ka sjell puna me filmin, ishin disa nga goditjet që mori nga diktatura. Ndërsa në Itali po përgatitet një botim kritik për veprimtarinë e tij artistike, që do të titullohet “Disidenti”.