Përballë rritjes së çmimeve të energjisë, vendet e BE-së po marrin masa për të lehtësuar qytetarët. Në të njëjtën kohë, priten vendimet e takimit të jashtëzakonshëm të ministrave të energjisë më 9 shtator, si dhe deklaratat e presidentes së BE-së Ursula von der Leyen më 14 shtator në lidhje me propozimet e Komisionit Evropian për vendosjen e një tavani mbi çmimet e energjisë.
Gjatë seancës së jashtëzakonshme, do të shqyrtohen propozime të tilla si vendosja e një tavani për çmimin e gazit të përdorur për prodhimin e energjisë elektrike ose ndërhyrjet për të parandaluar keqfunksionimet e tregut.
Ndihma emergjente për familjet dhe bizneset në Itali
Italia po përpiqet të përballojë rritjen e vazhdueshme në sektorin e energjisë me një sërë masash.
Qeveria e kryeministrit italian Mario Draghi ka miratuar që nga fillimi i vitit ndihma urgjente për familjet dhe bizneset e vendit, në total pesëdhjetë miliardë euro. Ndër të tjera, ai uli taksat shtetërore për karburantet me tridhjetë cent për litër, miratoi rimbursimet e taksave për bizneset që konsumojnë një sasi të madhe gazi natyror, si dhe uljen e TVSH-së në 5% për faturat e gazit dhe energjisë elektrike të dërguara për tridhjetë milionë familje dhe gjashtë milionë ndërmarrje tregtare.
Në të njëjtën kohë, qeveria Draghi bëri një përpjekje të madhe me qëllimin e taksimit të fitimeve të tepërta të kompanive të energjisë. Por, për momentin, borxhet ndaj publikut që llogariteshin në dhjetë miliardë euro, vetëm një miliard është paguar në arkën e shtetit.
‘Fundi i bollëkut dhe pakujdesisë’ në Francë
Me presidentin francez Emmanuel Macron në krye, Franca po përgatitet për atë që pa dyshim do të jetë një dimër ‘i vështirë’, ku askush nuk mund të parashikojë përmasat e vështirësive.
E vetmja gjë që është e sigurt është se reaktorët bërthamorë francezë do të punojnë tani e tutje “me kapacitet të plotë”. Ajo që është gjithashtu e sigurt është se prodhimi i energjisë me qymyr do të rritet, gjë që pak a shumë do të ndodhë në shumicën e vendeve evropiane, pavarësisht marrëveshjeve ekzistuese për t’u marrë me ndryshimet klimatike.
Masat për të mos prishur sigurinë energjetike në Austri
Qeveria federale austriake dhe qyteti i Vjenës ranë dakord pak ditë më parë për të shpëtuar, me një linjë kredie prej të paktën 2 miliardë euro deri në prill, ofruesin më të madh të energjisë në vend, Wien Energie, në mënyrë që të mos prishet siguria energjetike e rreth 2. milion banorë të kryeqytetit.
Por qyteti njoftoi se tani e tutje do të mbajë të fikur fenerët e famshëm të Krishtlindjeve në qendrën historike, ndërsa tregjet e hapura të Krishtlindjeve do të ndizen një orë më vonë se vitin e kaluar.
Fabrikat e mëdha të vendit duhet të përgatiten të operojnë me naftë nëse është e nevojshme, ndërsa dyqanet tashmë po kufizojnë ndriçimin e tyre të jashtëm dhe vendpushimet e skive po planifikojnë të kufizojnë funksionimin e ashensorëve. Aktualisht, megjithatë, kursimi i familjeve private bëhet kryesisht mbi baza vullnetare.
Ulja e TVSH-së dhe kontrolli i konsumit të energjisë në Belgjikë
Ulja e TVSH-së për energjinë në 6% në baza të përhershme u vendos javën e kaluar nga qeveria belge, me qëllim uljen e faturave të konsumatorëve dhe bizneseve. Kjo masë fillimisht u miratua në mënyrë të përkohshme në mars 2022.
Në të njëjtën kohë, qeveria belge po inkurajon qytetarët që t’i kushtojnë vëmendje konsumit të energjisë, i cili tashmë është ulur midis 10-15% krahasuar me vitin e kaluar. “Energjia që nuk e përdorni është padyshim më e lira. Nëse bëjmë përpjekje të gjithë së bashku, çmimet do të bien”, tha kryeministri belg Alexandre de Croix.
Qeveria federale do të takohet në ditët në vijim me federatat e punëdhënësve dhe të vetëpunësuarve dhe me përfaqësues të sektorëve veçanërisht të prekur nga kriza energjetike, për të shqyrtuar masat mbështetëse.
