Viktimat e krimit të dyfishtë që tronditi Fierin dhe mbarë opinionin publik ditën e djeshme, do të përcillen sot për në banesën e fundit.
61-vjeçari Xhavair Hoxha, do të përcillet për në banesën e fundit në fshatin e tij Vidhishtë, ndërsa 30-vjeçarja Merushe Hazizi do të prehët në varrezat pranë familjes së saj. 30-vjeçarja ishte nënë e 3 fëmijëve nga martesa e parë dhe fëmijët jetonin me ish-bashkëshortin, teksa ajo kishte 3 vite që bashkëjetonte me Fatjon Hoxha.
Pas konflikteve të vazhdueshme për shkak të mospranimit të kësaj lidhjeje nga 61-vjeçari, ka bërë që ai të qëllojë për vdekje me thikë të renë dhe më pas të vetëvaret në pemë në tokën e tij.
Detajet tragjike nga krimi makabër i bëri të ditura bashkëshortja e autorit, e cila teksa lante pellgun me gjak në korridorin e banesës, tregoi edhe sherret mes vjehrrit dhe nuses. Ajo tha se ata të dy ziheshin për faktin se kujt i takonte banesa. Pas shumë sherreve dhe debateve, duket se dje konflikti është përshkallëzuar akoma më shumë, duke bërë që vjehrri të merrte thikën dhe të masakronte nusen e djalit, duke e lënë atë të vdekur në vend. Pas krimit, ai doli nga banesa pa i thënë gjë njeriu dhe iku me vrap në arë, ndërsa atje kreu dhe aktin e rëndë të vetëvrasjes.
