Valmira Hasimllari, mamaja e foshnjës që u gjet e vdekur brenda një valixheje në dollapin e shtëpisë, është në gjendje të rënduar psikologjike, duke ia bërë të vështirë hetuesve zbardhjen e çështjes.
Mësohet se, Hasimllari është dërguar nga ana e drejtorisë së shëndetit mendor të Korçës drejt spitalit psikiatrik të Elbasanit pasi gjendja e saj paraqitet tejet e rënduar aq sa edhe grupi i hetimit e ka krejt të pamundur për të marrë në pyetje për të gjitha rrethanat e ngjarjes.
Nga ana tjetër, mostrat e foshnjës së gjetur pa jetë një ditë më parë, e mbyllur në një valixhe dhe e lënë në një dollap, janë dërguar për ekspertizë pranë mjekësisë ligjore në Tiranë. Mjekët ligjorë të shërbimit spitalor të Korçës kërkojnë të dinë moshën e foshnjës për të dalë në përfundimin nëse ka qenë lindje e zakonshme dhe jo abort.
Megjithëse, më herët është raportuar se fëmija ka qenë i formuar plotësisht çfarë tregon ai fëmija ka lindur, duke hedhur poshtë idenë e një aborti. Nga ana tjetër 40-vjecarja nuk është në gjendje për të dhënë sqarime rreth shtatëzanisë së saj dhe lindjes së foshnjës për shkak të problemeve të shëndetit mendor.
Lindja sipas burimeve është kryer pa asistencë për shkak të anemisë së theksuar, ndërsa 40-vjecarja ka qenë në rrezik serioz për jetën. Deri tani oficerët e policisë gjyqësore kanë marrë në pyetje nënën e 40-vjecares, bashkëshortin dhe fqinjët që kanë pasur kontakte. Nga ana tjetër burime që vijnë pranë shtëpisë së lindjes në Korçë pranohet zyrtarisht se 40-vjecarja prej muajit janar nuk rezulton të ketë pasur vizita mjekësore pranë këtij institucioni.
