Kolegji i Posaçëm i Apelimit (KPA) ka shkarkuar nga detyra kreun e Gjykatës së Apelit të Tiranës, Hysni Demiraj, duke e lënë kështu përfundimisht jashtë drejtësisë.
Anëtarët e KPA-së, Ardian Hajdari kryesues, Ina Rama relatore, Albana Shtylla, Luan Daci, Sokol Çomo lanë në fuqi vendimin e dhënë nga Komisioni i Pavarur i Kualifikimit.
Në shkurt të vitit të kaluar, KPK dha vendimin për të shkarkuar nga detyra Demirajn pas problemeve me pasurinë, por jo vetëm kaq. Nga konstatimet e komisionit të vettingut u vu re se Demiraj kishte probleme në vendimet e tij gjyqësore.
Prej viteve 1990, Hysni Demiraj ka punuar si gjyqtar në Gjirokastër. Në vitin 2009 ai u transferua në Gjykatën e Apelit në Tiranë, kurse në vitin 2016 u zgjodh kryetar i saj.
