Koreja Veriore ka lëshuar pesë raketa me rreze të shkurtër veprimi në det, në pjesën lindore të gadishullit korean.
Agjencia Yonhap e Koresë Jugore, duke cituar Shtatmadhorinë e ushtrisë, ka raportuar se raketat janë lëshuar sot.
Ky veprim vjen tri ditë pasi Koreja Veriore ka bërë provat e dy raketave me rreze të mesme veprimi.
Këto prova Këshilli i Sigurimit i Kombeve të Bashkuara i ka përshkruar si shkelje “të papranueshme” të rezuolutave të OKB-së.
Prej 10 marsit të këtij viti, kur kanë filluar ushtrimet e përbashkëta ushtarake vjetore të Shteteve të Bashkuara dhe Koresë Jugore, regjimi i izoluar komunist i Koresë Veriore, ka lëshuar tri herë raketa, duke thënë se ushtrimet amerikano-jugkoreane janë provë e agresionit.
