Kryeministri Edi Rama nuk i ka kursyer ofendimet ndaj opozitës në Kuvend duke i konsideruar disa herë si “kope budallenjsh”, një gjuhë kjo e papërshtatshme në Kuvend dhe aq për më tepër për një kryeministër.
“E keni në ADN. Në ADN e partisë tuaj që të trashëgoni budallëkun. Ta bazoni përsiatjen tuaj politike marrjen e njerëzve për budallenj. Ndaj do katandiseni me keq se kështu. Se ka një arsye pse jeni kështu. Ndahuni në sa pjesë që të doni dhe ju jeni si ajo pjesa e ndarë në sa pjesë të doni. Është e njëjta gjë. Ju që kulturalisht jeni kërcënimi më i madh i vendit tonë. Agresion permanent në Shqipëri. Është çështje kohe se kur shfaqet budallëku. Është sëmundje ngjitëse. Ju flisni të gjithë të njëjta fjalë. Ju nuk i dalloni dot po qe se dalloheni vetëm nga fytyra. Budallëku në kopenë tuaj është sëmundje ngjitëse”, tha Rama.
Në fjalën e tij kryeministri nuk është kursyer me gjuhën denigruese dhe fyese ndaj opozitës, por fakti më shqetësues është se kryetarja e Kuvendit Lindita Nikolla nuk ka bërë asnjë reagim. Nikolla nuk tentoi t’i ndërpresë fjalën Ramës apo t’i kërkojë të tërheqë ofendimit duke e lënë kreun e partisë së saj të shfrenojë gjuhën.
Në raste të ngjashme, Nikolla nuk ka nguruar t’i heqë mikrofonin deputetëve të opozitës, por kur vjen puna te kryeministri i saj, atij i lejohet gjithçka.
