Pas kontrolleve të SPAK në ambientet e një shoqate të themeluar nga ish-muxhahedinët pas dyshimeve se operonin si një rrjet i organizuar spiunazhi, dalin të tjera detaje. Avokati i ish-muxhahedinëve, Olsi Jazexhi kundërshton këto akuza ndërsa shprehet se kontrollet në banesat e tyre janë hakmarrje e Mariam Rajavit.
“Gjatë kontrollit të policisë në zyrat e kësaj shoqate dhe në individët që komanda muxhahedine akuzon si spiunë Iranian, e para nuk u gjet asgjë ilegale dhe arsyeja përse SPAK është detyruar që të nisë çështje kundër defektorëve, vjen pas ankesave të komandës muxhahedine në Manzë e cila po i sulmon politikisht dhe ideologjikisht defektorët”, është shprehur ai.
SPAK urdhëroi kontrolle edhe në ambientet e një shoqate të themeluar nga ish-muxhahedinët. Jazexhi shpjegon arsyet e themelimit të kësaj shoqate.
“Qëllimi i kësaj organizate është që të mbështesë të mbijetuarit e kampit xhihadist të Manzës, ka shumë anëtarë të këtij kampi të cilët kërkojnë të arratisen, të braktisin xhihadin e dhunshëm dhe të nisin një jetë qytetare”, ka deklaruar ai.
Hetimet ndaj ish-anëtarëve të organizatës MEK nisën 4 vite më parë.
