Gjykata Administrative e Tiranës ka pranuar një padi të kryekomisar Pal Marku, i cili kërkon anulimin e procedurave për konkursin për gradën “drejtues” në Policinë e Shtetit.
Procesi i gradave në Policinë e Shtetit ishte bllokuar për 5 vite me radhë, nga nëntori i vitit 2018, dhe u zhvillua gjatë kohës që organizata e uniformave blu drejtohet nga Muhamet Rrumbullaku dhe ministër i Brendshëm ishte Taulant Balla.
Kryekomisar Pal Marku kërkon anulimin e procesit që u zhvillua nga shkurti deri në prill të këtij viti me pretendimin se mënyra se si u procedua për gradën “Drejtues”, nxori në pah shumë paligjshmëri. Ai pretendon se konkursi ka pasur shkelje për të favorizuar të preferuarit.
Pavarësisht rezultatit me shkrim ndaj tij dhe disa kolegëve, sipas kryekomisarit, Komisioni i Vlerësimit iu dha shumë pak pikë qëllimisht në testin me gojë. Po ashtu sipas Markut , ish-kryepolici Rrumbullaku ndërroi rregullat dhe kriteret e vlerësimit në mënyrë të paligjshme ndërsa komisioni apelimit nuk ka marrë parasysh asnjë kontestim nga kryekomisarët.
Nëse Gjykata Administrative i jep të drejtë kryekomisarit Pal Marku, atëherë rrezikohet futja në kolaps e të gjithë procedurës së gradave në radhët e uniformave blu.
Lexo edhe:
Dritëhijet e një konkursi/ Si u ndërhy “me urdhër” për gradat në Policinë e Shtetit
