Në Shkodër, dy persona, 24 dhe 19 vjeç, janë arrestuar pas një konflikti fizik në lagjen “Kongresi i Përmetit”, ku dy të mitur 17-vjeçarë pësuan dëmtime të lehta. Po ashtu, për pesë të mitur të tjerë ka nisur procedimi penal.
Një tjetër 17-vjeçar po hetohet për mbajtje të lëndës narkotike kanabis, e sekuestruar gjatë kontrollit fizik.
Në Malësi të Madhe, një shtetase 59-vjeçe po procedohet për lidhje të paligjshme të energjisë elektrike në banesën e saj.
Ndërkohë, në Vau i Dejës, një supermarket në Kryebushat u shkrumbua nga një zjarr, dyshohet për shkak të një shkëndije elektrike. Nuk raportohet për persona të lënduar, ndërsa grupi hetimor po punon për përcaktimin e shkakut të incidentit.
Njoftimi:
Specialistët për Hetimin e Krimeve të Komisariatit të Policisë Shkodër arrestuan shtetasit Klevin Thepi, Doronesto Kulla, dhe filluan procedimin penal për pesë shtetas të mitur (4 prej tyre 17-vjeçarë dhe një 16-vjeçar).
Këta shtetas, në rrugë, në lagjen “Kongresi i Përmetit”, për motive të dobëta, janë konfliktuar fizikisht me njëri-tjetrin dhe si pasojë, kanë pësuar dëmtime të lehta dy shtetas të mitur 17-vjeçarë.
Në bashkëpunim me Prokurorinë vijon puna për dokumentimin e plotë ligjor të rastit.
Specialistët e Seksionit për Hetimin e Narkotikëve referuan materialet në Prokurori, ku nisi procedimi në gjendje të lirë për shtetasin e mitur 17-vjeçar, pasi gjatë kontrollit fizik, shërbimet e Policisë i gjetën një sasi lënde të dyshuar narkotike kanabis, e cila u sekuestrua në cilësinë e provës materiale.
